Пішуць жыхары Рэчыцкага раёна. Вясна прыйшла!
Источник: Dneprovec.by Фото: Леаніда ГАНІСЕЎСКАГА, носіць ілюстратыўны характар
Пацяплела на двары. На вуліцы збіраецца дзятва, а старыя сядзяць на лавачцы і назіраюць за імі, вядуць размовы пра свае справы. А ў небе над вёскай лётаюць буслы – ахоўнікі нашага мірнага жыцця.
Гэтыя птушкі – сімвал роднай краіны, сімвал ачышчэння зямлі ад усякай нечысці, бо нездарма бусел знішчае змей, якіх у народзе звычайна звязваюць з д'яблам. Лічыцца, што бусел абараняе хату ад дурнога вока і злых духаў. У хаце, побач з якой пасяліліся гэтыя птушкі, заўсёды будзе шчасце і дабрабыт. Для беларусаў гэта святыя недатыкальныя птушкі. Нельга ні пры якіх умовах шкодзіць ім. Іх забойства вядзе да бяды.
Да старога дзеда падбегла ўнучка з пытаннем:
– Дзядуля,чаму бусел адзін лятае?
– Няма ў яго пары. Відаць, яго сяброўка прапала. Вось і лётае то на луг, то сядзе на комін хаты. Прыглядваецца, дзе б гэта гняздо збудаваць. Трэба ж сям'ю заводзіць.
Пачуўшы гаворку пра буслоў, падышлі другія дзеці і пачалі прасіць расказаць штонебудзь цікавае яшчэ пра гэтых птушак.
– Ну, дык слухайце. Ёсць такая легенда. Некалі буслы нават дапамагалі сялянам глядзець малых дзяцей, пакуль бацькі працавалі ў полі. Аднойчы ў засуху пачаўся пажар. Смелыя птушкі заўважылі гэта і сталі выносіць з хат дзяцей, прыкрываючы іх сваімі крыламі ад спёкі і полымя. У той дзень у буслоў абпаліліся дзюба і ногі, а абпаленыя крылы пачарнелі па краях. З таго часу знешні выгляд птушак застаўся такім.
Уступае ў гутарку хлопчык Арцём, які ходзіць у школу:
– А я чуў, што, калі знойдзеш бусліную пёрку, абавязкова трэба прынесці ў хату і захоўваць яе. Гэта прыносіць удачу. Жывуць буслы каля 20 гадоў, а яшчэ яны любяць адпачываць, стоячы на адной назе.
Прайшоў дзень, другі. Унучка прыбегла да дзядулі з навіной: «Бусел знайшоў сабе сяброўку і будуюць буслянку на слупе каля гары». Дзеці радаваліся, што ў іх наваколлі пасяліліся цудоўныя птушкі. Вялі свае назіранні за імі. Праз колькі часу з'явіліся птушаняты. Шчырыя бацькі кармілі сваіх дзетак амаль два месяцы. Пасля вылету з гнязда клапатлівыя буслы кармілі іх яшчэ 2–3 тыдні. А ва ўзросце 70 дзён бусляняты канчаткова выраслі і пачалі лятаць. Палятаюць, сядуць на адну хату, затым пасядзяць на другой. Цікаўная ўнучка гэта заўважыла і да дзеда зноў бяжыць:
– Дзеда, буслікі прынеслі нашым суседзям маленькую дзяўчынку. Яны ж на коміне сядзелі.
Стары рассмяяўся і адказаў малой: «Гэта яны прадказвалі нараджэнне дзіцяці ў гэтай сям'і».
Узбуджанае клекатанне даўганогіх белакрылых птахаў разносіцца па наваколлі, несучы радасныя мелодыі новага жыцця. Вясна прыйшла!
Ніна ТРОШКА, в. Жмураўка