1833Пішуць жыхары Рэчыцкага раёна. «Прыйшла Каляда да нашага двара!»
Источник: Dneprovec.by Фото: прадастаўлена аўтарам
Напярэдадні святкавання старога Новага года ў беларускія гарады і вёскі не забывае завітаць яшчэ адно народнае свята – Каляды.
І хоць каранавірус унёс свае сумныя карэктывы ў нашу сучаснасць, іскрынкі беларускага нацыянальнага свята «абпалілі», захапілі-закалядавалі. Няхай пад маскаю, але ўварваліся Калядкі і ў нашу родную вёсачку Ліскі!
Забаўляльна-пазнавальная праграма «Калядкі ў беларускай хатцы» радаснай віхурай пранеслася па Ліскаўскай сярэдняй школе і прыпынілася ў прыгожай вясковай хаце (кабінет беларускай мовы і літаратуры), старанна аздобленай атрыбутамі сялянскага побыту: рушнікамі, вышыванкамі, гліняным і драўляным посудам, калаўротам, лаўкай, беларускім нацыянальным адзеннем, калыскай.
На сталах зацікаўленых удзельнікаў свята, вучняў і настаўнікаў чакалі салодкія пачастункі. Але галоўнае – гэта выступленне самадзейных артыстаў, якія парадавалі прыпеўкамі, забаўлялкамі, гумарэскамі. Былі тут дзед і баба, цыган з мядзведзем, цыганка, казёл і, канешне ж, калядоўшчыкі.
Усе прысутныя атрымалі радасць і асалоду ад убачанага. Вялікі дзякуй арганізатару свята Аксане Дашук і самадзейным артыстам: Ягору Грыбу, Ганне Купрэйчык, Настассі Панчанка, Аксане Патапчык і іншым! Падараванае свята пасадзейнічала яшчэ большай зацікаўленасці ў вывучэнні беларускай нацыянальнай культуры, народных традыцый і свят.
«На новае лета хай родзіцца жыта!» А жыта – ад слова «жыць». Значыць, трэба пастарацца пера-адолець усе няўзгоды, каб жыць, радавацца і святкаваць!
